January 30, 2013

നാഷനലിസ്റ്റ്

മഹാരാഷ്ട്രയില്‍ ഒരു എന്‍.സി.പി നേതാവ്‌ ഒന്നേകാല്‍ കോടി രൂപ ചിലവാക്കി മൂന്നര കിലോ സ്വര്‍ണ്ണം കൊണ്ട് കുപ്പായം തുന്നിയിരിക്കുന്നു. പ്രാദേശിക, ദേശീയ, അന്താരാഷ്ട്ര വാര്‍ത്താമാധ്യമങ്ങളില്‍ വര്‍ണ്ണ ചിത്രം സഹിതം വാര്‍ത്ത വരുമ്പോള്‍ കിട്ടുന്ന പബ്ലിസിറ്റി മുന്നില്‍കണ്ടുകൊണ്ടാണ് നേതാവ് ഈ സാഹസത്തിനു മുതിര്‍ന്നത്. അടുത്ത ലോകസഭാ തിരഞ്ഞെടുപ്പില്‍ സീറ്റ്‌ കിട്ടാന്‍ ഇത് സഹായിക്കും എന്ന് നേതാവ് കണക്ക് കൂട്ടുന്നു. പട്ടിണിപ്പാവങ്ങളെയും, മാനം മറക്കാന്‍ ഒരു കീറത്തുണി പോലും സ്വന്തമായി ഇല്ലാത്തവരെയും ലോകസഭയില്‍ പ്രതിനിധീകരിക്കാന്‍ നേതാവിന് സ്വര്‍ണ്ണക്കുപ്പായം! അധികാരം കിട്ടുന്നതിനു വേണ്ടി എന്തും ചെയ്യാന്‍ ഇറങ്ങി പുറപ്പെട്ട ഇമ്മാതിരി നേതാക്കള്‍ ഏതു വകയില്‍ ആണ് 'നാഷനലിസ്റ്റ്' ആകുന്നത് എന്ന് എനിക്ക് എത്ര ആലോചിച്ചിട്ടും മനസ്സിലാകുന്നില്ല.

നഗ്നത മറക്കാന്‍ കഷ്ടപ്പെട്ട യുവതിക്ക് സ്വന്തം വസ്ത്രം കൊടുത്ത മഹാത്മാവിന്റെ ചിത്രം വെച്ചു പൂജിക്കുന്ന പാര്‍ട്ടിക്കാര്‍ ഇതുപോലുള്ള പേക്കൂത്തുകള്‍ നടത്തുന്നത് കാണുമ്പോള്‍ ആ മഹാത്മാവ് പോലും അഹിംസ വെടിഞ്ഞു ആയുധം എടുത്താല്‍ അട്ഭുതപ്പെടാനില്ല. ആ മഹാത്മാവിന്റെ ചരമ ദിനത്തില്‍ തന്നെ ഇങ്ങനെ ഒരു വാര്‍ത്ത പത്രത്തില്‍ വന്നത് വിധി വൈപരീത്യം എന്നല്ലാതെ എന്ത് പറയാന്‍. 

.

No comments:

LinkWithin

Blog Widget by LinkWithin